الصبليون: عبد الصمد الزلزولي هو ميسي المغرب

كيواصل الدولي المغربي عبد الصمد الزلزولي التألق مع فرقتو أوساسونا الصبليوني، وقدم ماتش كبير البارح الخميس، ضد فريق إسبانيول فالجولة 11 من لاليكا.
عبد الصمد الزلزولي كان من وراء بيت الرباح ديال أوساسونا وهو اللي منح أسيست البيت، وقدم مستوى كبير وفواحد الهجمة راوغ الدفاع ديال إسبانيول وكان قريب يماركي البيت، الأمر اللي جعل رابطة بطولة الصبليون تشبهو بأسطورة كرة القدم الأرجنتيني ميسي.
ونشرت لاليكا محاولت عبد الصمد الزلزولي وهو كيدريبلي فاللاعابا ديال إسبانيول، على صفحتها فمواقع التواصل الاجتماعي، وعلقت عليها: عبد الصمد الزلزولي هو ميسي المغرب".
وتألق الدولي المغربي عبد الصمد الزلزولي مع أوساسونا ملي جا له فبداية هاذ الموسم بريطي من البارصا، وكلشي كيتوقع يشارك مع المنتخب المغربي فكأس العالم المقبلة فقطر بالنظر للمستوى اللي مقدم فبطولة الصبليون.