الكاف غفل الفراقي وأجل قرعة العصبة وكأس الكونفدرالية بلا سبب

كتواصل الإرتجالية والعشوائية فالتنظيم ديال الإتحاد الإتحاد الإفريقي لكرة القدم، للمسابقات الإفريقية والكلام هنا على دوري أبطال إفريقيا وكأس الكونفدرالية الإفريقية اللي تأجلت قرعة دور المجموعات ديالهم على غفلة وبلا مبرر من الكاف.
الإتحاد الإفريقي لكرة القدم خرج قبل لحظات ببلاغ مفاجئ كيعلن فيه تأجيل قرعة دوري أبطال إفريقيا وكأس الكونفدرالية الإفريقية، من بعدما كانت مبرمجة هاذي سيمانات باش تجرى غدا الأربعاء 16 نونبر، والفراقي ديال لافريك كاملين كانوا كيتسناوها بما فيهم الوداد والرجاء والجيش الملكي الممثلين ديال المغرب فالمسابقتين.
وكانت الأندية الإفريقية كتسنا تعرف غدا على خصومها فدور مجموعات دوري أبطال إفريقيا وكأس الكونفدرالية الإفريقية، باش ملي ترجع المنافسات من بعد توقف كأس العالم تكون واحدة تلعب ديريكت خصوصا وأن العام غادي يكون مشارجي حيث فلافريك غادي توقف الكرة فكأس العالم وفكأس إفريقيا للمحليين فعام 2023، ولكن الكاف أجل القرعة بلا مبرر وبدون ما يحدد تاريخ جديد لإجراءها.