سلطت جماهير المغرب الفاسي غضبها على رئيس النادي إسماعيل الجامعي والمكتب المديري ديالو بسبب ثمن تيكي ماتش الفرقة ضد مولودية وجدة فالجولة 8 من البطولة الإحترافية لكرة القدم، واللي دارو له 40 درهم للمدرجات العريانة و 150 درهم المغطاة. فصيل "الفتال تايكرز" ما خلاش فرصة الزيادة فثمن تيكي ماتش فرقتو المغرب الفاسي الدوز بدون ما يحتج وربطها بالأزمة الاقتصادية ديال ناس مدينة وفاس وسلط الغضب ديالو على رئيس الماص الجامعي والمكتب المديري. وقال الفصيل المصاوي: "فظروف كتتسم بالأزمة الإقتصادية و الإختناق المطبق على الطبقة المسحوقة من زيادات فالأسعار و انعدام فرص الشغل بمدينة فاس، طل علينا المكتب برئاسة اسماعيل الجامعي بقرار زيادة ثمن تذكرة الدخول فالمباراة القادمة ضد مولودية وجدة". وأكد "الفتال تايكرز" على أن الزيادة فثمن التذكرة ما مسلكاش المصاويين وقال: "قرار مجحف فحق الجماهير الماصوية اللي كتعاني البطالة والقهرة فمدينة فاس، وكتقاوم وكتحاول مساندة الفريق رغم الظروف الصعبة، حيث الفريق والملعب هما الملجأ الوحيد اللي تبقى لها فهذا البلد السعيد، ولكن المكتب عندو رأي آخر وقرر ردع الجماهير اللي موحشة تشجع فريقها و رؤية الصفرة الغالية، فبلاصتما يشجعها ويحفزها و ويسهل ولوجها للتيران باش تنفس من ضغوطات الحياة". الفصيل المصاوي طلع له الدم من قرار الجامعي والمكتب ديال وقال: "كنشوفو المكتب كينهج سياسة ضد الجمهور لمحاربتو وكيزيد يثقل عليه، وكنطالبو الرئيس بالتراجع عن قرار الزيادة فثمن التذكرة وإلاّ يتحمل مسؤوليتو فيما قد تؤول إليه الأمور بعد هاذ القرار المجحف، راه كرة القدم كانت و لا زالت وغتظل لكافة وعموم الطبقات الشعبية".
