بنكيران: الحاكم الحقيقي ديال المغرب هو الملك ماشي رئيس الحكومة.. وهاكيفاش سيدنا دخلني للبيت ومخلاش مستشارين يكونو معنا باش يوافقلي على دعم الأرامل

قال عبد الاله بنكيران، الأمين العام لحزب العدالة والتنمية، إن "الحاكم الحقيقي ديال المغرب هو جلالة الملك ماشي رئيس الحكومة، ولكن واخا هو اللي كيحكم ماشي كيدير كولشي، فاش كيدير رئيس الحكومة شي حاجة يلا كانت مزيانة كيخليك ديرها وكيعاونك".
وأضاف بنكيران، خلال تجمع حزبي اليوم الأحد، :"ف قضية الارامل كان فيه بلوكاج بعد شهور باش منقولش سنوات، من بعد مجلس وزاري دخلني الملك لواحد البيت ومخلاش مستشارين يدخلو وقالي :"سي بنكيران داكشي ديال الارامل نوض ديرو".
وأوضح بنكيران :"يمكن كاع بكيت وتأترت ونضت بست ليه يدو.. وقال لي جلالة الملك :"انا الان مرتاح .. هادشي فحال الضمان الاجتماعي في فرنسا".
وشدد بنكيران بأن رئيس الحكومة كذلك عندو دور، وذكر بتجربتو الحكومية من 2011 تال 2016.