المعجبين ديال الكوميدية لوسيل بول كاعيين حيت نيكول كيدمان لعبات شخصيتها ففيلم جديد – فيديوهات

كتعيش الممثلة الأسترالية نيكول كيدمان وسط ضجة كبيرة بعدما علنات أنها غادي تلعب دور الممثلة الكوميدية الميريكانية لوسيل بول (Lucille Ball).
بمجرد ما تحطات لابوند أنونص ديال الفيلم (Being the Ricardos)، ناضو بعض المحبين ديال لوسيل بول وقالو أن كيدمان "كتسيئ" للرمزية ديال الأسطورة الراحلة لوسيل.
بنت الكوميدية الميريكانية لوسيل أرناز (Lucie Arnaz) خرجات قبل في فيديو وقالت أن نيكول كيدمان ماكتشبه لماماها فوالو، وماكتضحكش بحالها، ولكن زادت كَالت أنها غادي تسنى حتى تتفرج فالفيلم وتحكم من بعد.
وفعلا من بعد شافت الفيلم ورجعات دارت فيديو آخر كتشكر فيه نيكول كيدمان والممثل الإسباني خافيير بارديم (اللي لعب دور راجل لوسيل بول) و كل فريق الفيلم وقالت أنه عجبها و بللي كلشي خدم مزيان على هاد الفيلم اللي عطا صورة زوينة على الوالدة ديالها و كل عائلتها ومحيطها، كيف كانت كتعيش وقتها.
وفاللخر نصحات أرناز المهتمين بهاد القصة والمحبين ديال ماماها، خصوصا اللي كانو كاعيين فاللول وماعجبهومش الحال حيت كيدمان غاتلعب دور لوسيل بول، نصحاتهم باش يتفرجو فالفيلم بمجرد مايخرج حيت زوين وممتع.