ماتبغيهاش لعدوك.. طيارة هازة بوندرول مكتوب فيها "واش تزوجيني؟" طاحت وتفرشخات – فيديو

كشفات السلطات الكندية أن طيارة كانت هازة لافتة مكتوب فيها "واش تزوجيني؟" (Will you Marry Me) طاحت حوالي الساعة 6 ديال العشية.
السقوط وقع في پارك دييپ (Park Dieppe) قريب من كَنطرة "كونكورد" ف جزيرة "سانت إيلين" (Île Sainte-Hélène) في مونتريال، وماشي بعيد من البلاصة اللي فيها فيستڤال "أوشيكَا" (Osheaga festival) ديال الموسيقى.
الحادث كان خايب بزاف، مات فيه شخص والثاني (الپيلوط) حالتو صعيبة.
المتحدث بإسم مجلس سلامة النقل الكندي (TSB) ماكشفش على هوية الضحايا، لكن أكد أن حالة السيد اللي هزوه للصبيطار خايبة.
الطيارة تابعة لشركة خاصة وبزاف الناس كيعتامدو على الخدمات ديالها في الإعلانات الرسمية ديالهم والمناسبات والأفراح.