الپاس ڤاكسينال قريب يتفرض على المغاربة.. وزارة الصحة: جواز التلقيح مهم بزاف وغادي يولي اجباري لدخول الفضاءات العمومية – فيديو

كتتجه وزارة الصحة المغربية لفرض جواز التلقيح ضد فيروس كورونا المستجد على المواطنين، بحال كيف فارضة فرانسا الجواز الصحي Le Pass Sanitaire على مواطنيها.
ولبارح دارت الوزارة أول فيديو تحسيسي ليها فهذ الصدد، على صفحاتها على موقع التواصل الاجتماعي، كتاكد من خلالو للناس أن الجواز غيولي إجباري للدخول لكَاع المرافق العمومية المغلقة.
والفيديو عبارة عن حوار بين جوج ديال الناس، واحد مادايرش الجرعة الثانية والثاني ملقح بالكامل، وكينصح صاحبو باش يكمل التلقيح وياخد الجواز الصحي، حيت غيولي مطلوب فالإدارات والقهاوي والمسارح والسينما والسوبرمارشيات، والتيرانات، وحتى وسائل النقل العمومية، بالإضافة لكونو مطلوب للتنقل بين المدن.
والفرق بينا وبين فرنسا أننا حنا مازال معتمدين جواز التلقيح، في حين هذ الأخيرة معتمدة الجواز الصحي، اللي فيه معلومات على واش المعني ملقح، او عندو تيست PCR سلبي مافايتش 48 ساعة، أو برا حديثا من كورونا، وباقي مصاب بيها.