غرق بنت فواد الدرادر. المواطنين كيحتجو والجامعة الوطنية للتعليم: السلطات المحلية هي المسؤولة

الساكنة ديال منطقة دوار الهواوس فجماعة المجاعرة بإقليم وازان، عبرات على استنكارها واحتجاجها على مواقع التواصل الاجتماعية، بعد وفاة تلميذة عندها 15 لعام غارقة فواد الدرادر، لبارح الجمعة.
هذشي خرج الجامعة الوطنية للتعليم على الصمت ديالها، اللي قالت فبيان ليها، اليوم، أن السلطات المحلية هي اللي كتتحمل المسؤولية ديال وقوع هذ الحادثة، كيف ساءلاتها على توفر مقومات البيئيات الضرورية الآمنة، ومدى جودة البنية التحتية فالمنطقة، فظل الاضطراب المناخي اللي عرفاتو البلاد.
وزادت الجامعة، أن هذ الجريمة "النكراء" مشات على إثرها طفلة "فعمر الزهور"، ما عندها حتى ذنب من غير أنها ساكنة فبلاصة بحال هذي، وعندها رغبة فممارسة حقها فالتعليم.
من جهة خرى، استنكرات الجامعة غياب البنيات التحتية من طرق وقناطر وإنارة عمومية ووسائل نقل، اللي قالت ان الضحية تحرمات منهم، واللي كان من الممكن تحميها من انها تكون ضحية للسيول.
ولبارح توفات التلميذة وهي غادة فطريقها لإعدادية أبو بكر الرازي، فدوار الهواوس فجماعة المجاعرة، بعدما داها واد الدرادر اللي كان حمل بسبب الشتا اللي طاحت بزاف فإقليم وازان.