للمرة الثانية فهذ السيمانة.. العافية شعلات فسناك فأكَادير

للمرة الثانية فهذ السيمانة كتشعل العافية فسناك فأكَادير، بحيث اليوم فالصباح تحرق سناك فحي الداخلة فعاصمة سوس، ووصلات العافية حتى للطبقة اللولة دالعمارة فين كاين السناك، وخلف الحريق خسائر فادحة، بدون تسجيل أي إصابات فالأرواح.
وحسب مصادر محلية، فسكان الحي والعمارة بالخصوص تخلعو، والناس اللي ساكنين فالطبقة اللولة والثانية هربو كاملين وطلعو للسطح، فانتظار تجي البومبية تعتقهم من العافية.
وصحاب الوقاية المدنية ماتعطلوش بزاف، وقدرو يطفيو العافية، بينما السلطات المحلية فتحات تحقيق تحت إشراف النيابة العامة المتخصصة، باش يعرفو ظروف وملابسات الحادث.
وغير الثلاثاء اللي فات تفركَع سناك، بسبب بوطة كَاز صغيرة، وخلف خسائر مادية فادحة، بلا ما يتسبب فإصابة حتى شي واحد.