علاش الوالي زنيبر مزال مابغا يزيد ساعة لصحاب المطاعم ففاس وخا تحسنات الحالة الوبائية.. مصدر ل"كود": مايمكنش يغامر والقرار ماشي ديالو بوحدو

الحالة الوبائية على صعيد مدينة فاس استقرت بزايد ورجعات لمدينة كتسجل أرقام مزيانة حسب ما كشفت عنه المديرية الجهوية لوزارة الصحة. مثلاً البارح فاس سجلات غير 26 إصابة جديدة ب"كورونا" ومزال 182 مصاب يخضعون للعلاجات.
عدد من أرباب المقاهي والفاعلين في القطاع السياحي بالمدينة، سيما المطاعم المصنفة، تضرروا بزاف من جائحة "كورونا"، وكاعيين على توقيت الإغلاق المحدود على الساعة الحادية عشر ليلاً. علاش الوالي ميزيدش ساعة باش يكون فرج ولو غير شويا على هاد الفئة. تنتعش فاس اللّي كلات لعصا ماشي غير في زمن "كورونا". هادي سنوات وهي كتعاني.
مصدر مطلع ل"كود" أوضح أن الوالي ميمكنش ليه يغامر وبالعكس عاطي أهمية كبيرة للقطاع السياحي وباغي يكون منتعش لكن يستحيل يغامر وخا الوضع الوبائي في تحسن، مشيرا إلى أن القرار ماشي بيد بوحدو بل بيد لجنة اليقظة الإقليمية التي يترأسها وأي قرار يتم اتخاذه بمشاركة مختلف القطاعات وخاصة الصحية.