سالى زمان الحكَرا على لمرا.. من خلال حملة "حيت أنا راجل".. الأمم المتحدة كتطالب الرجال يعاونو عيالاتهم فالشقا دالدار والتربية دالدراري

دعات هيئة الأمم المتحدة للمرأة الرجال باش يساهمو فالحملة التحسيسية "حيت أنا راجل"، اللي كتهدف لتشجيع الرجال على الانخراط فالفضاء الأسري بشكل متساوي مع العيالات، من خلال المشاركة فشغال الدار وتربية ورعاية الأطفال، وخصوصا فهذ الفترة ديال الحجر الصحي.
وحسب بلاغ لهيئة الأمم المتحدة للمرأة، كتهدف حملة "حيت أنا راجل" لنقل رسائل إيجابية، باش تمهد الطريق لتغيير المواقف الاجتماعية لصالح المساواة بين الجنسين، وهكذا غادي تعطي الكلمة للرجال والآباء باش يتكلمو بشكل عفوي على كيفاش كيعاونو عيالاتهم، وينشرو تجاربهم على مواقع التواصل الاجتماعي، ويطلبو من الرجال يديرو هذشي حتى هوما ففترة الحجر الصحي وموراه.
والقناة الثانية "دوزيم" تكلفات بالبث ديال 10 أشرطة فيديو قصيرة طيلة فترة الحجر الصحي، كتبين مجموعة من الرجال اللي شاركو فهذ الحملة، وبينو على أنهم كيعاونو عيالاتهم فالديور، وكيساعدوهم فالمهام المنزلية، وكان أبرز هذ الأشرطة شريط للممثل المغربي سعيد باي، اللي تكلم فيه على كيفاش كيعاون مرتو فالدار، وكيساعد بنتو فالواجبات المدرسية ديالها.
وهذ الحملة كتجي فإطار البرنامج الإقليمي "الرجال والنساء من أجل المساواة بين الجنسين"، اللي دارتو هيئة الأمم المتحدة للمرأة فالمغرب ولبنان ومصر والأردن وفلسطين وتونس، بشراكة مع الوكالة ااسويدية للتعاون الإنمائي الدولي "سيدا".