بعدما دوز العقوبة ديالو السجنية.. علي عراس خرج من الحبس

اليوم الخميس، خرج المغربي البلجيكي علي عراس من الحبس، بعدما دوز العقوبة ديالو السجنية اللي دامت 12 لعام، بعدما تمت ادانته بتهمة "اقتراف أعمال إرهابية"
اليوم علي خرج من حبس تيفلت، وختو وعائلتو فمليلية كاتتسناه يرجع فحدود الإسبانية بين مليلية المحتلة والمغرب، وكتقول فتصريحات للصحافة "علي اليوم خرج.. وهذي هي آخر مرحلة.. شفنا المحاين بألوان مختلفة منين تشد.. ودابا بغيناه غير نشوفوه".
وغايمكن لعلي يتلاقا بالأخت ديالو فالحدود الاسبانية، قبل ما يمشي لبلجيكا عند الزوجة ديالو وبنتو اللي فعمرها 15 لعام، هذشي إلى تيسرات الأمور، وخا كيبان دابا من المستحيل من بعد ما توقفو الرحلات الجوية.
علي، اللي فعمرو 58 عام، كان فمليلة فاش تم اعتقالو واتهامو بتهريب الأسلحة لجماعات إرهابية سنة 2008، السلطات الاسبانية اللي اعتقلاتو، وسلماتو للسلطات المغربية، فالوقت اللي بلجيكا ماعترضاتش على هذشي واخا السيد عندو جنسية مزدوجة.