دار موتة حمارة باش مايرجعش للمغرب.. حراكَ كيتبوحط ودار راسو مريض ب”كورونا” فالطاليان

حراكَ مغربي كيسكن فمدينة فورلي الإيطالية دار راسو مريض ب”كورونا” باش مارجعوهش البوليس للمغرب من بعد ما عرفوه مهاجر سري.
واكدات تقارير لمواقع إيطالية بللي الحراكَ، اللي عندو 26 فعمرو، وعندو سوابق فتهريب المخدرات اللي دوز عليها عامين و8 شهور ديال الحبس، بغا يضحك على البوليس ويوهمهم أنه مريض بالفيروس بالصح، من بعد ما كلا أقراص مهلوسة رفعات درجة الحرارة ديالو ل39.
هذشي خلا البوليس مع السلطات الطبية يتدخلو على الفور باش يديرولو التحليلات اللازمة، لكن اكتشفو ان السيد ماعندو والو وغير كيتبوحط.
ومباشرة بعدما خرجو نتائج التحليلات، سافطو بوليس فورلي الحراكَ بحالو للمغرب عن طريق مركز بورنوليسكي لترحيل المهاجرين السريين.