كورونا فيروس". المغرب والجزائر تقريبا بحال بحال فالاصابات وفالوفيات والسيمانا الجاية حاسمة لينا بجوج

كلشي تقريبا بحال بحال بخصوص "كورونا فيروس". المغرب والجزائر. حنا عندنا فالصباح 358 حالة. هما كثر منا ب50 حالة عندهم 409. هما تسجل عندهم 42 حالة وحنا اكثر من 70 حالة جديدة. هما قتلات عندهم 26 جزائري وحنا قتلات عندنا 23 حالة. الوضع فالبلدان جوج متحكم فيه وبزاف.
بجوج البلدان دارو الوقاية سياسة ليهم. حقاش لا المغرب لا الجزائر قادرين على الخيار الثاني اللي هو العلاج. لا امكانيات الصحة الجزائرية ولا قطاع الصحة بالمغرب قادر يتعامل حتى مع عشرة الاف حالة. ايلى وصلو ليها وهاد العدد راه قليل بزاف٬ غادية تولي كارثة صحية ووضع ما تقدرش الدولتين تتحكم فيه.
دابا فالعالم وصلنا لنص مليون حالة كورونا. امريكا فاتت 100 الف وولات هي الاولى وايطاليا البارح قتل فيها اكثر من الف وفاسبانيا هاد الفيروس قتل اكثر من 700 حالة.
هاد الشي علاش الوضع فالمغرب والجزائر راه وردي وبزاف وبجوج غاديين نخرجو منها ايلى بقينا فهاد الارقام القليلة وتزاد كل نهار مائة او اكثر شوية حتى تسالي فترة الذروة اللي ممكن تكون نهاية هاد الاسبوع او الاسبوع المقبل.
على اي الاسبوع المقبل حاسم بزاف لينا بجوج