كورونا. اللي خرج يتسركل مورا الستة مايلوم غير راسو.. البوليس داير خدمتو فكازا والمطاردات مستمرة فمولاي رشيد ولالة مريم وكَاع الأحياء الشعبية

البوليس ديال كازا دايرين خدمتهم باش يشدو كَاع الناس اللي كيتسركلو برا ديورهم فحالة الطوارئ، وخصوصا بالليل من ورا الستة.
لبارح بالليل كانت مطاردات وتوقيفات صارمة، شي عشرة دالأشخاص تم توقيفهم حيت خرجو يدورو فأحياء مولاي رشيد ولالة مريم بلا حتى شي سبب، الأمن ديال حي مولاي رشيد مشدد المراقبة على السيكتور، واللي حصل يودي.
ومنين تعلنات على حالة الطوارئ ولزمات وزارة الداخلية على الناس يبقاو فديورهم وماخرجو غير فالنهار وبتصريح عون السلطة، البوليس بداو يشدو بشكل يومي العشرات فكازا، خصوصا فالأحياء الشعبية بحال سيدي مومن والأناسي والحي المحمدي والسباتة، والبارح جا الدور على مولاي رشيد.
وكتجي هذ العملية الأمنية باش تتنفذ التدابير الوقائية المعتمدة من طرف السلطات فهذ الظرفية الاستثنائية، وباش يتم تطبيق مرسوم أحكام حالة الطوارئ الصحية، وبالتالي الحد من خروج الناس ومن انتشار الفيروس فالبلاد.