رسميا.. الداخلية سمحات للصحافيين حاملي البطاقة المهنية باش يخرجو يديرو تغطيات ميدانية خلال حالة الطوارئ الصحية

تجاوبات وزارة الداخلية والمديرية العامة للأمن الوطني مع المراسلة اللي سافطها رئيس المجلس الوطني للصحافة ليهم لبارح، بشكل إيجابي، وسمحات لحاملي بطاقة الصحافة، بشكل رسمي، باش يتحركو بيها فهذ الفترة ديال حالة الطوارئ الصحية.
وحسب بلاغ للمجلس الوطني للصحافة، توصلات "كود" بنسخة منو، عطات وزارة الداخلية والمديرية العامة للأمن الوطني تعليماتها بالسماح بالتحرك للصحافيية حاملي البطاقة، باش يمارسوا المهام ديالهم، لكن ماشي باش يديرو شي حاجة اخرى خارج هذ النطاق.
وطلب المجلس من الصحافيين باش يلتزمو بهذ الإجراءات، ومايخرجوض من ديورهوم إلا لأغراض مهنية، ويقومو بالواجب ديالهم فهذ الظرفية ويحتارمو قواعد أخلاقيات المهنة.
والمجلس حيا من المسؤولين على المؤسسات الإعلامية على مواصلة العمل فهذ المرحلة، والالتزام بالثبوت فالميدان رغم الإكراهات، والعمل على التحسيس والتوعية باحترام حالة الطوارئ والإجراءات الوقائية.