ردو بالكم.. “كورونا” قادر يبقى لبزاف دالسوايع فالهوى وكثر من 3 ايام فالسطوحا

اعلنات دراسة جديدة بللي فيروس “كورونا” قادر يبقى حي ومعدي فالدفال ديال الإنسان المريض اللي طاير مع الهوى سوايع كثار، ويقدر يبقى فالسطح ديال لحاجات كثر من ثلاث أيام، لكن مايفوتش سيمانة.
ودرسو علماء فالمعهد الوطني للحساسية والامراض المعدية التابع للمعاهد الوطنية مدى قدرة انتقال الفيروس من الشخص المصاب بيه للسطوحا ديال الديور والسبيطارات.
ودرسو العلماء هذشي من خلال جهاز كيلوح الذفال اللي فيه كورونا بنفس وتيرة الكحة او العطيس، واكتشفو باللي الفيروس قادر يبقى معدي فالهوى وممكن يتقاسو بيه الناس لمدة 3 ساعات على الأقل.
والفيروس، حسب العلماء، كايبقى لاصق فالفولاذ اللي مكايتصداش ثلث يام، فالكارطون يوم واحد، فالنحاس ربعة ديال السوايع.