رسميا.. منظمة الصحة العالمية: “كورونا” وباء عالمي و”جايحة كحلة”

أكد تيدروس أدهانوم، المدير العام ديال منظمة الصحة العالمية، بللي كيمكن يتصنف فيروس “كورونا” المستجد فقائمة الوباءات العالمية الخطيرة، بحالو بحال الطاعون للي سماوه المغاربة ف القديم ب”الجايحة الكحلة”.
وزاد أدهانوم كيقول، فمؤتمر صحفي ديال المنظمة اليوم الأربعاء، بللي الفيروس يقدر يشكل تهديد كبير، والمنظمة غادير جهدها باش تحد من الآثار ديالو، وخصوصا منها الاقتصادية.
وكان أدهانوم صرح لبارح بللي جميع المجتمعات المحلية والحكومات خاصها تتعامل مع الوضع بجدية، كيف دارت الشينوا وإيطاليا وسنغفورة على مستوى التوعية وإنشاء شبكات كثيرة لمراقبة المرض باش يكتشفو البؤر ديالو بالزربة.
من جهة خرى، تأسف المدير العام ديال المنظمة بكون ان مجموعة من الدول ماكاتعلنش على العدد الحقيقي ديال المصابين بالفيروس.
وارتافع عدد المصابين ب”كورونا” عبر العالم لكثر من 100 ألف شخص، وماتو منو كثر من 4 آلاف و300 واحد، أغلبيتهم فالشينوا وإيطاليا وإيران.