شاط الخير على زعير.. “لارام” كتسافر ب”مؤثرين” فانستگرام لميامي واليونان فابور وكتفرق في الرحلات ب0 درهم

من شهر 9 ولارام دايرة حملة في انستكَرام كتسافر بصحابات وصحاب الانستكَرام لي عندهم متابعين بزاف. وكيف كيقول المثل شاط الخير على زعير، هاد الشركة لي كيديرها المدير عبو غادي وكيزيد يغرق ليها الشقف.
هاد السيمانة “لارام” داو الماكيوز صونيا نكادي هي وراجلها لميامي، والكوبل دارو مسابقة، أي واحد من المعلقين عرف الوجهة ديالهم كيربح رحلة ذهاب واياب فابور من لارام فيها كلشي.
دابا الشركة عوض ماتحسن من خدماتها كتحاول تلمع صورتها من خلال تضياع الفلوس على هاد الناس لي حياتهم كاملة اشهارات في انستكرام وكل بوسط كيتخلصو عليه.
هاد الحملة لي دايرين باسم #ramchallenge شاركو فيها بزاف ديال المشاهر، بحال أمين ويزيد المعروف ب”HLS” لي داوه لليونان، والممثلة اسماء الخمليشي لي مشات لايطاليا، وهشام مسرار لي داوه حتى هو لليونان، وأسماء أخرى.