ناضت اليوم فالمكتب الجامعي للجامعة الملكية لكرة القدم اللي انعاقد فالرباط. كان الصداع. كانو جوج استقالات. الاولى ديال مدرب الاسود رونار اللي ولات رسمية اي انه جابها مليكاليزيا كاملة مكمولة. دابا يقدرو يقولو القضية سالات وصفحة رونار تسدات. غير هاد الصفحة ما تسدات حتى نوضاتها. الخرجات الاعلامية المكثفة لرونار بتنسيق من سمسمار اللعابة كريم الابلق خربقات الجامعة. الابلق فرق على صحابو وعشرانو حوارات. محمد مقروف مستشار فوزي لقجع المكلف بالتواصل طلع ليه الدم. بغى يرد عليه٬ خاصة انو جبدو فشي حوار من الحوارات. مقروف وفق مصدر ل”كود” قدم استقالتو اليوم. قال باللي ما بغاش يبقى خدام فهاد المنصب كاع. المكتب الجامعي رفض هاد الاستقالة. بغاو يديرو بيان كاع يعلنو باللي كيتصداو لكل واحد يضربو او كيضرب الجامعة. هو رفض يخرج بيان بحال هاكا ولكن بقى متشبث بهاد الاستقالة. القضية فيها قصة بين كريم الابلق ومعاه رونار ومقروف. المدرب السابق والسمسار كيشوفو فمقفروف معيق باش يجيبو صحابهم كيف دارو مع المصور الفرنسي اللي جابو رونار فالكان. جابو رغم معارضة مقروف ورفضو. دار ليه من الدورة وجابو وكانت الشوهة. الاستقالة وفق مصدر “كود” ترفضات ومن المتوقع يستمر مقروف فمهامو.
