سكوب. لمغاربة تصطاو بغاو يحرگو من كالينينگراد اللي الناموس ما يقدر يخرج. شدو 68 مغربي فالحدود البولونية والليتوانية وها فين حاصلين

بعد 25 مغربي ضربهم فليطوكس وبغاو يحرگو من سان بيترسبورگ لفلندا ونساو باللي جوج الدولات عندهم تزيار كبير كبير فالهجرة٬ علمت “كود” ان السلطات الروسية فكالينينگراد شدات 68 مغربي اخر بغاو يحرگو لليتوانيا وبولونيا.
وفق مصدر رسمي ل”كود” فان هاد العدد مقسم على الدولتين وان السلطات الروسية شقماتهم قبل ما يدخلو واخبرت السلطات المغربية بالامر.
دابا راهم فواحد المحطة ديال التران.
هاد لمغاربة حتى هما تصطاو جاو للمنطقة الاكثر عسكرة يمكن فروسيا وبغاو يسلتو وراه الناموس ما يقدرش يخرج. هاد المنطقة كتوقع بين بولونيا وليتوانيا وما عندها حدود ما روسيا وتشكل منطقة غاية فالحساسية عسكريا لحماية موسكو. هاد الشي علاش كاينة المراقبة بزاف بزاف بزاف