في أي مجتمع على وجه لبسيطة التعليم كيتعتبر فيه واحد الركيزة لا مندوحة عنها من أجل تحقيق الإقلاع الإقتصادي والفكري,و كاع لمجلات بدون أي إستثناء فهما مرهونين الى حد بعيد بمدى جودة التعليم,وكاين بزاف د النماذج والتجارب ديال دول كانت على شفا جرف من الإنهيار التام وقدرت في ظرف وجيز جدا أنها تبدا من القاع وتتربع على عرش الدول المتقدمة, بفضل المراهنة على عنصر التعليم وحنا في المغرب وعلى غرار كاع باقي الدول _لعريبانية_ للي كنتقاسمو معهم التخلف ..هادي واحد لمدة تقريبا تزيد عن أربعين سنة أو أكثر ..بقينا كندورو فيها غير فبلاصتنا بخصوص النقاش حول هاد الموضوع للي كان ديما كينتهي بدون أي نتائج ..وكأننا نخوي لماء على لكرعة , وتدور في هاته الأثناء على صفحات الفيسبوك واحد الحملة واسعة تدعو لإعادة الإعتبار للمدرسة العمومية المغربية شارك فيها وتفاعل معها بزاف ديال النشطاء بأراء ومواقف تقريبا تصب في منحى واحد للي كانه هو ضرورة تحسين جودة التعليم … وهادي كانت واحد العينة ديال التدوينات تتعلق بهاد لبلان نبتدئها مع سي عمر الشرقاوي لي كتب بكل خجل هذي هي الاصلاحات في مجال التعليم اللي واعدات الحكومة في مخططها التشريعي تديريها طيلة ولايتها، 4 مشاريع قوانين فقط وعندنا جوج ديال الوزرا فالتعليم. المصيبة ان حتى هذ الوعود قليلة ما تحققاش كلها، فقد فشلت الحكومة تحت ضغوطات لوبي التعليم الخاص في تغير القانون الخاص بالتعليم الخصوصي اما قانون الغش ما خرج حتى ناضت عليه القيامة. غادي تقولولي وسي الشرقاوي نسيتي قانون الإطار الخاص بالتعليم غادي نقولكم سمحوا ليا فهذاك ماكان ضمن الوعود لأنه جاء نتاج تدخل الملك اللي طالب المجلس الاعلى للتربية والتكوين بإعداد رؤية العشرية القادمة وبعدها طالب الملك الحكومة بإعداد المشروع الذي أصبح مؤكدا أنه لن يرى النور حتى للحكومة المقبلة شتو علاش التعليم ديالنا اللور اللور بحال الرويضة ديال السكور أما فيما يخص المناشير اللي جات على شكل كوبي كولي وهما باش إنطلقت الحملة ديال الحالمون الجدد للي كانت ربما طريقة غير موفقة بتاتا …كان هناك من جهة اخرى نشطاء أدلو بسطولهم وعبرو على مواقفهم بطريقتهم وليس بداك الإملاء العبيط ديال أحلم وأفيق وما فتئ وما عتق بحال الناشطة جان دارك لي شاركت الحملة بتدوينة طويلة كان مفادها عندي ولد وبنت واحد فبعثة فرنسية ووحدة فحضانة. …البرهوشة اللي فيها شبر لاروب خلصنا عليها لبارح 7500 درهم واجب التسجيل. …عاد 1200 شهريا و150 ديال لاكارد وشي فرتيت آخر لاحسبناه غانلقاو راسنا وصلنا ل1500 درهم من الشهر الشهر على نص بلاصة باقا دايرة ليكوش. هاذ الفلوس ماخلصناهاش حيث شايطة علينا ولا حيث لاباس علينا ولكن بحثا عن الأمان. … هاذ البنية فايت حطيتها فروض ماغانقولوش عادي ولكن متوسط المستوى ….من النوع اللي معمرين المدن المغربية. ….ذاك الشي ديال البلابل والحناقز وطيور الجنة. …قلنا قريب للدار وبنية صغيرة مازال ماعرفاش المهم العناية. ثاني نهار مدرسة غانمشي نجيبها نلقاها مفكوكة ليها يدها من الكتف حيث المعلمة نترثها بالجهد غانخرجها وندخلها لمدرسة تعتبر الاحسن على مستوى المدينة. ..قلنا نخسرو شوية الفلوس ومايكرفصوهاش. ….آخر السنة وقعت الواقعة المشهورة اللي دازت فالاخبار على كلهم القنوات المغربية. ….تسمم عدد كبير من الوليدات بسباب وجبة غداء فلاكنتين ديال المدرسة. خرجناها منها هاذ العام ودخلناها لهاذ المدرسة الجديدة اللي مولاتها أستاذة متقاعدة والأطر كلهم أكفاء سواء كانو مغاربة أو أجانب واجب التسجيل كيفما كاتشوفو مبالغ فيه وقابل للزيادة فأي وقت ورغم ذلك كانبقاو نقولو ها العار غايتهلاو. هاذ البنية كاتمشي للمدرسة حيث مها وباها خدامين وماحداهمش تا واحد من عائلتهم اللي يقدر يشدها ليهم وآخا غا ساعة. ….حتى خدوج اللي جبناها تعاوننا ولينا حنا اللي خدامين عندها. من واقع عملي بالتعليم نقدر نقول ليكم حاجة وحدة هيا انه بين طمع المؤسسات الخصوصية والسيبة اللي كايعرفها القطاع وافلاس المدرسة العمومية المتعمد. …ضاااع التعليم ياولدي. هذا وبالنسبة للناشط عمر طالب بدوره فكتب على نفس المنوال أنا قريت فيهم بجوج، فالخصوصي وفالعمومي، بجوجهم كيف كيف، فقط واحد الفرق طفيييييف كاين بيناتهم.. فالبريفي وفالمخزن، قريت عند جوج أنواع ديال الأساتذة : – النوع اللول : اولاد الحرام، ماكيقريو والو، كيتفلاو على اولاد الشعب، ماكيتصوقش ليك، وكيقوليك لهلا يقلب ولهلا يقري جد مك كاع، هاد النوع دارو "الثروة" من التعليم، دارو الطوموبيلات والفيلات والديور، وكلخو اولاد وبنات المغاربة . وهاد النوع هو اللي كثير بزاف فالأستاذة ديال هاد البلاد. – النوع الثاني : اولاد الناس، ولكين قلال، كيخدمو من نيتهم وكيديرو مجهود تواصلي كبير باش هاداك اللي ماكيفهمش بزاف يفعم عالأقل غير شي حاجة قليلة، هاد النوع أنا كانقوليه تحية، أنا شخصيا عمرني نسيتهم، البعض منهم مزال كانتلاقا بيه لدابا، حيت كانو أساتذة معقولين وماكيتفلاوش على اولاد المغاربة كيف كيديرو بزاف ديال الأساتذة. وبسباب هاد النموذج اللي ولا فالمدرسة المغربية هادي حوالي 10 سنوات، من هنا 10 سنوات نيت، غاتقواد على المغريب، والدولة غادا توحل لاحقاش كولشي غايكون مكلخ، كولشي ماخدامش، كولشي غايولي كيكريسي وكيقلب على الفلوس، وديك الساعة، أجي فكها انت… بلادنا ما عندهاش النفس على اولادها وبناتها _____ أما فيما يخص الناشط مصطفى بويهي فكتب انا واحد من ولاد الشعب، اقول بان المدرسة في المغرب عموما بشكلها الحالي لا العمومية والا الخاصة كتكون بنادم عندو نفس تركيبة الأفكار و فالغالب غي العاهات والأشكال لي خارجة من قالب واحد… مدرسة كترد التلميذ عبد للنقط و تصنع مستقبله بنائا على تلك النقط… مدرسة لي كتخرج طبيب داعشي و فرماسيان يعتقد بأن الاصطفاء الطبيعي كفر و مؤامرة و ان بنادم تحول ورجع قرد منذ اللحظة فاش قرا عبارة **قردة خاسئين **… اولا قراوها عليه للمزيد من التدقيق…. مدرسة لي كتدخلك صحة فتنافس غير متكافئ على الاطلاق مع بوكيمونات انت تعلم مدى غبائها و قصر فهمها، ولكنها تتفوق عليك لأنك ببساطة لم تدخلها لتتنافس….. مدرسة لي يالاه عقلك كيتذوق شي مجال او موضوع علمي او غيره، كتبغي تفهمو وتمزك ليه تا كتفاجئ بأطنان من الواجبات اللي كدير لك تخمة وكتولي تحفظ باش تجيب مزيان باش عاودتاني دخل لسباق نتا مخيروكش واش دخل ليه…. مدرسة لي غي كتبدا توعا كتدرك انك محتاج عملية فرمتة لداكشي لي قريتي باش تبدا على اسس سليمة –حالة التاريخ–… مدرسة لي ستكون سويا او اقرب الى الأسوياء ان لم تدخلها اصلا في منطقتك للأشياء…. مدرسة متخصصة في تفريخ من لا يعلمون شيئا والأخطر يعتقدون انهم يعلمون _____ وعودة للأستاذ عمر الشرقاوي للي أعاد تدوينة أخرى في نفس السياق كان هذا مختصرها انا ما طالبش شي حاجة كبيرة بغينا مدرسة تحترم كرامتنا فيها أقسام ما تيهزوش ستين تلميذ فيها مرحضات مقادين ونقيين فيها ساحات فين يلعبوا ولادنا الإستراحة بغينا مدارس تقي تلاميذنا الحر والبرد بغينا مدارس قريبة من الأسر الفقيرة فالمدن والبوادي والمداشر، بغينا تعليم يحترم ذكاءنا ويفتح عقول أبناءنا على العصر ويحافظ ليهم على ثوابتهم بغينا سياسات تعليمية ما تتحكرش رجال التعليم وتتعترف ليهم بمجهودهم ومعاناتهم في تربية أولادنا. ما طالبينش شي حاجة كبيرة طالبين فقط انقاد مدارسنا وتعليمنا من الفساد والسماسرية والحسابات السياسوية ______ من جانب اخر كتب الناشط عثمان عشقي ساخرا كمواطن مغربي ابن المدرسة العمومية أطالب بالبحث عن أسباب انقراض تلك العينة من التلاميذ الغلاظ الشداد الكسالى الذين كانوا يقومون بمساعدة المعلمين في "تحمال" زملائهم في الفصل. _______ فيما الناشط يوسف بلعربي فدون على خلفية هاد الحملة منشورا كان مفاده يتعامل مع تلاميذه بمنطق التمييز، يكرس الطبقية، يحابي أبناء الموظفين و رجال السلطة على حساب أبناء العمال الكادحين و المياومين، لا يتوانى في ضخ نقاط إضافية في رصيد من دأبوا على إرتياد منزله قصد تلقينهم دروس الدعم و التقوية، يتلقى الهدايا بمناسبة أو بدونها، يتحرش بتلميذاته اللواتي يعشن مرحلة المراهقة،ساهم بشكل جلي في تردي وضع المدرسة العمومية….. و مع ذلك و بدون خجل يبادر لنشر تغريدة تطالب بمجانية التعليم و بضرورة دمقرطته و إصلاحه إصلاحا جذريا _____ وفي نفس السياق تقريبا الناشط حمزة أمسلاك تاهوا فقد كتب من الأعمدة الأساسية ديال أيّ نظام هو التّعليم..لا كان النّظام محتاج لدجاج بدون روح و بدون ضمير، فخاصّك تعليم تايصنع ليك دجاج و فرارج و حشرات..لا كان النّظام محتاج لبنادم بصيغته المحترمة، فخاصّك تعليم تايصنع ليك بنادم محترم.. لذا الهضرة بزّاف ما صالحة لوالو، و تانرجعو ديما لأصل الموشكيل: النّظام..بغيت نقول شي حاجة، ساعة القانون الجنائي ما تايرحمش، و الغرامة ما كاينش فلوسها.. وبدوره الناشط طه الزروق فقد دون ما خلاصته ما كرهتش تولي الدارجة هي لغة التعليم خلال السلك الابتدائي،و الطفل الأمازيغي يقرا بالأمازيغية و الصحراوي يقرا بالصحراوية ما يكونش السقوط و التكرار لأطفال الابتدائي الانجليزية تكون هي اللغة الثانية الأساسية في التعليم الفرنسية و العربية يكونو لغات اختيارية و ثالثة السلك الثانوي يكون بنظام شبه عسكري بتوحيد الزي و الانضباط الدراسات العليا يكونوا بالانجليزية البحوث العلمية والسطاجات يدعموهم الشركات الخاصة مقابل تخفيض ضريبي ما كرهتش ثورة في نظامنا التعليمي. _______________ وختامها مسك مع الناشط حسن حمورو الذي أوصى كل من جاتو الغيرة على التعليم العمومي يواجه التحكم ويناضل من اجل حكومة سياسية تشارك فيها احزاب وطنية جادة ومستقلة في قراراتها ومواقفها… وشكرا على غيرتكم!.
