سيتم حجب هذه الصورة تلقائيا عندما يتم الإبلاغ عنها من طرف عدة أشخاص.
نهار طلعات العدالة والتنمية، قالو غادي ترد البلاد بحال أفغانستان، بحال الا راه لبلاد سايبة وليس لديها رب يحميها وملك يحكمها ويسودها وبنك دولي يحدد سياساتها الإقتصادية
– نهار طلعات العدالة والتنمية، صدعونا شي وحدين بأنها غادا ترد البلاد بحال أفغانستان، بحال الى راه لبلاد سايبة وليس لديها رب يحميها وملك يحكمها ويسودها وبنك دولي يحدد سياساتها الإقتصادية، وبقاو سامرين على الحزب، كيتسناوه غي فوقاش يوقع فخطأ التنافي مع ما دعى إليه أيام حملته الإنتخابية، وطبعا حزب لامبة لم يخيب الأمل ولكن في اتجاه ما هو ايجابي نوعا ما.
أنا كليبيرتاري، كنتمنى شي نهار المغرب يحضى حقا بحزب بهاد التوجه السياسي، ولكن مع العدالة و التنمية وقبلها مع الإتحاد الإشتراكي بان ليا أن المغرب ممحتاجش حزب بتوجه ليبيرالي باش ينهج سياسة ليبيرالية اقتصاديا، وحتى اجتماعيا شيئا ما، وبانليا أنه واخا يحكمنا النهج الديمقراطي، فراه غادي يبقى مول الشكارة الكبيرة ولي كيعطينا العاقة فوقت التحنسير هو لي كيحدد سياسات المغرب الإقتصادية.
التصريحات الأخيرة ديال بنكيران، يمكن نعتابروها و لأول مرة أول تصريح منطقي ماشي شعبوي، تصريح دو بعد اقتصادي، وهو لي بغات الوقت، دابا حنا أصلا محسوب علينا أننا كنستافدو من الرعاية الإجتماعية، من حقنا فالتمدرس و الصحة وداكشي، ولكن فالحقيقية كاع داكشي كيبقى بحال الى شكلي وبدون المستوى المطلوب وبنادم كيفضل يمشي للكلينيكات والعيادات عوض يمشي لسبيطار الدولة حيث غادي يلقى خدمات بدون المستوى ديال الضرائب لي كيدفع، ومن الفوق تبقى تتجدر عليه الدولة بأنها موفرة ليه الصحة فابور، وحتى فالتعليم راه بنادم وللى كيهرب من مدرسة الدولة وكيكلف راسو باش يقري ولادو فالبريفي، وولاو مدارس الدولة عندهم صورة وحدة أنهم مدارس ولاد الشعب، ماشي مدارس كاع لمغاربة، وفالنهاية راه البريفي هو لي كينتج النخب أما مدارس الدولة حاليا كتنتج ولكن فحالات فردية وخاصة لاغير، وكتنتج المشرملين كثر ملي كتنتج القراية.
أنا رأيي الشخصي خاص الدولة ترفع يديها على الخدمات العامة، وترفع شعار شري تندغ كري تبات، وكولشي خاص يتخوصص، وترفع الدولة يديها على الإقتصاد متدخلش فالسوق نهائيا، للوصول الى اقتصاد حر أكثر، داكشي ديال ميلتون فريدمان والليبيرتارية المحافظة.
حاجة فابور كتعلم لعكز، هادا مثل مغربي، لذا بالنسبة ليا خاص باش نتخلاو على هاد لعكز والذل لي ولفناه مع حاجة فابور، نوليو نطلقو الريال وهذا غادي يكون حافز على باش نقلبو منين نجيبوه، وحتى جامعاتنا ماتبقاش مفرخة للفاشلين والدمادم، تولي بالفلوس والفلوس بزاف، وبمنح للمتفوقين فقط، ديك الساعة بنادم ماغادي يولد حتى يشوف راسو بعدا واش مؤهل للأمر، وواش عندو باش يقري ويداوي، ماشي يتسناه يجي بخبزتو، وملي يخرج بيديه خاويين يبقى يندب على الدولة توفرليه التعليم و الصحة فابور، آش درتي باش تستاهل داكشي.
