ريال مدريد وصلو للطفل المغربي اللي ماتت له عائلتو فزلزال الحوز باش يديوه لاسبانيا

وصل ريال مدريد الإسباني بالفعل للطفل المغربي اللي ماتو له عائلتو فزلزال الحوز العنيف، اللي خطف أرواح كثر من 2900 شخص وطيح كثر من 5000 مصاب.
وأعلنت قناة "العربية" من خلال الموفد ديالها بالمنطقة الجبلية اللي فيها دوار الطفل المعني بالأمر، أن ريال مدريد تواصلو مع القناة بالفعل باش يلقاو الولد اللي ظهر فالقناة وهو لابس توني الريال وكيدوي على فاجعة موت الولدين ديالو وخوتو فزلزال الحوز.
مراسل قناة العربية دار حوار جديد، مع الطفل اللي عندو 14 عام والاسم ديالو عبد الرحيم أوحيدا، وأكد أن ريال مدريد كيقلبو عليه وتواصلو مع القناة على قبلو حيث باغيين يتكفلو به، وغيديوه لإسبانيا باش يلعب ويقرا على حساب النادي.
رد فعل الطفل كان إيجابي بزاف وفرح بهاد المبادرة ديال ريال مدريد معه، اللي غتخفف شوية من ضدمة الفاجعة بعدما مشوا له فيها والديه وخوتو وما بقى له حتى حد، وبحال جميع الأطفال قال إنه كيحلم يولي لاعب كبير فالمستقبل، ولكن الحلم ديالو هو يكمل قرايتو ويحقق الأمنية ديال باباه ويولي شي حاجة زوينة فالمستقبل، وأكد أنه فحالة تيسرت له الأمور وصبح لاعب فريال مدريد ما غينساش الدوار ديالو والناس اللي فيه وغيعاونهم بداكشي اللي قدر عليه.