بودريقة والرجاء تفاعلو مع الطفل الرجاوي اللي مشات عائلتو كلها ضحية زلزال الحوز وكيقلبو عليه

تفاعلت إدارة الرجاء الرياضي مع نداء الطفل اللي ماتو ليه والديه وخوتو فزلزال الحوز، وغيتكلف النادي بالدراسة والمتطلبات ديالو.
وظهر واحد الطفل فمنطقة جبلية لابس توني ديال الرجاء الرياضي، فواحد الفيديو ومعه 2 ديال الناس كيهضرو فبلاصتو وقالو بللي ماتو له والديه وخوتو فالزلزال وما بقى عندو حتى حد فهاد الدنيا، وطلبو شي واحد يعاونو باش على الاقل يكمل فرايتو.
وعلى الفور تفاعلت جماهير الرجاء الرياضي مع الطفل وطلقت حملة على مواقع التواصل الاجتماعي، وطالبت إدارة النادي برئاسة محمد بودريقة التدخل لإنقاذ مستقبل الولد الصغير، وحسب مصادر مطلعة فإدارة النادي تفاعلت حتى هي مع الفيديو ديال الطفل وبودريقة كلف اللي يقلب على هاتف الطفل أو شي شخص يوصل الفريق له باش يعاونوه.
نفس المصادر، أكدت أن الرجاء باغيين يتكلفو بالطفل ضمن مشروع دراسة ورياضة ديال أكاديمية النادي ويضمن استقرار الحياة الشخصية والمستقبل ديالو، حيث بودريقة خدام فتوجه رياضي اجتماعي داخل الرجاء ولدها قبل من زلزال الحوز، وراه دخل أطفال صغار من الدواوير المجاورة لأكاديمية النادي بمنطقة بوسكورة يلعبو فمدرسة الخضرا غير الأيام اللي فاتت.