عكس كل ميركاتو.. الانتقالات الصيفية تسدات هذه المرة فالسكات وحتى حد ما تسوقها بسبب زلزال الحوز

سالا الميركاتو الصيفي ديال كرة القدم بالمغرب مع منتصف الليلة الماضية، وحتى واحد ما داها فيه حيث كلشي ملاهي مع زلزال الحوز والمخلفات ديالو القاصحة من خسائر بشرية ومادية.
وعكس العادة، فالميركاتو الصيفي هذه المرة سالا فالسكات وهذا الشي البارح السبت مع 12 الليل، وجماهير الفرق المغربية ما داوهاش فيه، حيث بحالهم بحال جميع المغاربة ملاهين مع زلزال الحوز وحملة التضامن الكبيرة مع الضحايا ديالو.
الساعات الأخيرة من كل ميركاتو، كانت كتعرف واحد الحركة سريعة وماشي عادية من طرف مسؤولين ديال الأندية، وكانو كيزربو يسنيو مع لاعبين فآخر اللحظات باش يخطفو الهوتة ويتعاقدو مع اللاعبين بأقل ثمن، ويبينو للجمهور ديالهم راهم خدامين، ولكن هذه المرة هذا الشي ما كانش وتهناو من ضغط المشجعين حيث كلشي ملاهي مع الفاجعة.
وكانت الأندية المغربية محركة خلال مرحلة الانتقالات الصيفية الماضية فالأسابيع اللي فاتت، بحال الرجاء والوداد اللي دارو انتدابات كثيرة وبعدهم فريق الجيش الملكي، فالوقت اللي كاينين فرق مشاو سناو مع لاعبين وما قدروش يكونفوكيوهم بسبب المنع بحال شباب المحمدية، وأيضا فرق محنهم المنع بحال اتحاد طنجة والمغرب التطواني.