كشف محمد بودريقة رئيس الرجاء الرياضي الوضعية المالية اللي لقى فيها النادي، ملي طلعو للرئاسة ديالو خلفا للرئيس السابق عزيز البدراوي، ومشكل المنع من الانتدابات اللي خاصهم يحلوه باش يديرو التعاقدات، وأكد أنهم نجحو حتى لدابا فحل النصف ديالها تقريبا، وفطريقهم باش يتغلبو على النصف الآخر. وقال محمد بودريقة رئيس الرجاء الرياضي ملي طل على الجماهير الرجاوية عبر الصفحة الرسمية د النادي: "المنع من الانتدابات عند الرجاء الرياضي المبلغ ديالو هو مليار و200 مليون سنتيم، وهي أحكام نهائية وما عندكش كيفاش تقدر تحيدها، من غير أنك تؤدي هذا المبالغ للأشخاص اللي معك فنزاع". ووضح بودريقة كثر: "نظام التعاقدات كيفرض عليك أنك تؤكد بلي خلصتي ملف بملف، باش تقدر تدير تعاقدات جديدة، إذا حنا كمكتب مديري عندنا مليار و200 مليون سنتيم ديال المنع، وعندنا لاعبين جداد اللي بغينا نتعاقدو معهم ونسدو الخصاص ديالنا، وعندنا كذلك هادوك 72 عقد اللي مفروض علينا نديرو مفاوضات مع ماليهم باش ما يوليوش حتى هم نزاعات ونلقاو ريوسنا العام الجاي طايحين فنفس الإشكال". وكمل بودريقة: "ملي جينا لقينا 4 اللاعبين مشاو دارو مسطرة الاتحاد الدولي لكرة القدم "الفيفا"، وهم روجر اهولو وسيلا اللي مشى دابا يحترف بتنزانيا، وأكسيل مايي ولاعبين أخرين اللي كاينين معنا دابا، وراه كانوا بداو مسطرة فسخ العقد، بحال دابا كمثال اكسيل مايي كون كملت لابروسيدير، راه بحال هذا اليوم من الموسم الجاي، غنلقاو أن المنع هو 800 مليون غير ديال مايي بوحدو، وباش الناس تفهم الملف د اكسيل مايي راه كبير وخاصو يتعالج بحكمة ورزانة، حيث تم انتداب لاعب بمبلغ 400 مليون سنتيم من اتحاد طنجة، وهذا المبلغ تخلص منو غير 200 مليون وطنجة مازالين لحد الساعة كيتسالو 200 مليون، وكذلك اللاعب عندو 300 مليون و400 مليون بالإضافة إلى مبلغ هذا السنة". وأكد محمد بودريقة: "خدمنا على هذا الشي كامل، وبخصوص ملف المنع فتقريبا 50% تحل بشكل ودي، وتخلصو فلوس فهاد الشي ومبالغ كبيرة، ودابا مازال عندنا إشكال فواحد 6 مليون درهم، وكنحاولو ما أمكن نتغلبو عليها باش اللاعبين الجداد نسجلهم فالوقت المحدد ويلعبو مع الفريق، وغيكون خير فهذا الشي". وفضح بودريقة ملف اللاعب الكونكولي اكسيل مايي اللي جابو الرئيس السابق عزيز البدراوي من إتحاد طنجة الصيف الماضي قبل ما يصيفطو بريطي لأولمبيك أسفي فالميركاتو الشتوي اللي فات ويرجع دابا للفريق، وكيفاش دبر البدراوي الصفقة، مع الطنجاويين اللي مازال كيتسالو فلوس فيها وكذلك اللاعب اللي مازال كيستال مستحقاتو. وكشف محمد بودريقة ملف اكسيل مايي وقال: "بحال دابا كمثال اكسيل مايي كون كملت لابروسيدير، راه بحال هذا اليوم من الموسم الجاي، غنلقاو أن المنع هو 800 مليون غير ديال مايي بوحدو، وباش الناس تفهم الملف د اكسيل مايي راه كبير وخاصو يتعالج بحكمة ورزانة، حيث تم انتذاب اللاعب بمبلغ 400 مليون سنتيم من إتحاد طنجة، وهذا المبلغ تخلصت منو غير 200 مليون، وطنجة مازالين لحد الساعة كيتسالو 200 مليون، وكذلك اللاعب عندو 300 مليون و 400 مليون بالإضافة إلى مبلغ هذا السنة".
