صفقة جديدة فطريقها الرجاء.. بودريقة باغي يسني مع لاعب آخر يعزز به الفريق

كيوجد الرجاء الرياضي برئاسة محمد بودريقة باش يسني صفقة أخرى مع لاعب جديد أجنبي، باغي ينتادبو باش يلبس توني الخضرا ابتداء من هذا الصيف، بعدما غيز مع صانع الألعاب الجنوب إفريقي هاشم دومينكو والمدافع عبد الله خفيفي.
وحسب مصدر مطلع، فكيتعلق الأمر باللاعب الكونكولي فيليبي كينزومبي جناح تيبي مازيمبي اللي عندو 25 عام، وراه توصل محمد بودريقة معه لاتفاق مبدئي باش يلعب مع الرجاء الرياضي ابتداء من الموسم الجاي، وهذا الشي في انتظار يجي للمغرب باش تكون الأمور رسمية ويسني مع الفريق العقد ديالو.
ومن المنتظر يعزز الرجاء الرياضي الصفوف ديالو بانتدابات وازنة خلال الميركاتو الصيفي الحالي، حيث باغي النادي برئاسة محمد بودريقة يعوض الإخفاق ديال الفريق الموسم الجاري اللي قريب يسالي تحت رئاسة عزيز البدراوي، وكذلك راه كاينين لاعبين كثار غيمشيو بحالهم من الخضرا مع الاحتفاظ باللاعبين المزيانين.