رجع عزيز البدراوي رئيس الرجاء الرياضي يثير الجدل من جديد وهاد المرة ما تقبلش انتقادات الجماهير الرجاوية اللي ديجا غاضبة عليه بسبب الطريقة اللي كيسير بها الفريق والوعود اللي عطاهم وما وفاش بها ملي صبح رئيس والنادي اللي زاد تأزم فالمرحلة ديالو، وزاد شعل غضب الجمهور هاد العشية بسبب اللاعب عماد الرياحي نجم شباب السوالم اللي هو مطلب جماهيري للرجاويين فالميركاتو الشتوية الحالي. قبل لحظات خرج عزيز البدراوي واحد الخروج مفاجئ جديد بتدوينة على انستغرام، باش يرد على جماهير الرجاء اللي طالباتو يسني مع اللاعب عماد الرياحي نجم شباب السوالم وقال: "عماد الرياحي لاعب مزيان باغي يلعب في الرجا، تلقيت cv ديالو من عند أحد الأصدقاء وعرضتو على المدرب منذر الكبير وكان جوابو واضح:" الرياحي لاعب مزيان ولكن أنا عندي بحال البروفايل ديالو في الجهة اليمنى يسري بوزوق، أنا خاصني مهاجم قناص".. انتهى كلام المدرب وطويت صفحة هذا اللاعب قلبو ليكم على شيحاجة أخرى هادي سالينا منها". جماهير الرجاء الرياضي ما تقبلتش مبررات عزيز البدراوي وحتى الطريقة باش تكلم بها معهم على اللاعب، وبداو كيسولو على السبب الحقيقي لعدم رغبة رئيس الرجاء فالتوقيع مع اللاعب عماد الرياحي، وكاين اللي منهم قال إن البدراوي كيعبد من أي لاعب كيدخل فريق الجيش الملكي فالمنافسة على التوقيع معه، وكاين اللي استغرب من عدم استغلال رغبة اللاعب فاللعب للخضرا ويسني معه باش يعاون يسري بوزوق اللاعب الحالي ديال الفريق، اواش قادر بوزوق بوحدو يكمل العام فالبوسط ديالو وعلاش ما يجيبش البدراوي اللاعب الرياحي يتنافس معه على البلاصة، وكاين اللي سخر من الطريقة اللي تكلم بها مع الجمهور وطالبو بالرحيل من رئاسة الرجاء، وهاد الأسئلة والتعليقات وغيرها من الانتقادات ما تقبلهاش رئيس الرجاء عزيز البدراوي وهو يحيد التعليقات من التدوينة اللي حط فانستغرام.
