روكي مدرب المحمدية: زيرنا الوداد واخا عندنا غير 18 لاعب وربحونا غبزز

أكد رشيد روكي مدرب شباب المحمدية، أن الفريق ديالو كان ند قوي للوداد الرياضي فالماتش اللي جمع بين الفريقين البارح الاحد فتيران البشير، برسم الدورة 2 من البطولة الاحترافية لكرة القدم، وأن الواك ربحو غير بزز فريق كيدور غير ب18 لاعب اللي هو شباب المحمدية.
وتحدث رشيد روكي بعد خسارة شباب المحمدية مع الوداد الرياضي، وقال: "الماتش اليوم كان ضد الوداد الرياضي فريق كبير داكشي علاش كان علينا نردو البال من البداية، ولعبنا بدافع وسط باش ندير ليكونتر أتاك، وبالفعل لقينا مساحات كثيرة فدفاع الوداد وجاونا فرص ماركينا منهم 2 بيوتا، وجاتنا فرصة فالشوط الثاني اللي نقتلو بها الماتش ولكن اللاعب ديالنا تعطل شويا".
ووضح مدرب شباب المحمدية: "على العموم المباراة كانت متكافئة، الوداد سيطرو على الماتش فالأول ولكن ملي ماركينا اللاعبين رجعت لهم الثقة حيث دخلنا للماتش حشمانين فالأول، شباب المحمدية لعب بطريقة أخرى بعد التعادل وولينا كنشدو كرة بحال الوداد، والشوط الأول خرج متكافئ 2 مقابل 2، والشوط الثاني عطينا فيه تعليمات باش تبقاو على نفس الطريقة مانزيدوش نغامرو فالهجوم".
وكمل رشيد روكي: "الوداد لقاو صعوبات كثيرة فالوصول إلى مرمى شباب المحمدية، وماركاو هدف الرباح من ضربة خطأ وما يمكنش نلومو شي حد فكرة ثابتة حيث بحالها بحال البلانتي في بعض الأحيان كيلعب فيها الحظ دور كبير، وحنا لعبنا بالإمكانيات ديالنا، راه فهاد جوج ماتشات لعبنا غير ب18 لاعب، ولحد الساعة مازال ما أهلنا اللاعبين الجداد".