الزنيتي: كريستيانو ولاعبين النصر دارو الفرق فالماتش.. حاولنا نرجعو فالمباراة ولو كان فريق آخر بلاصة الرجاء كون استسلم

أكد أنس الزنيتي حارس مرمى الرجاء الرياضي أن الثلاثة أهداف اللي تلقاهم الفريق فالشوط الأول من عند النصر السعودي فماتش ربع نهائي كأس العرب اليوم الأحد، حسمو النتجية بكري وأن جودة وإمكانيات كرستيانو وصحابو دارت الفرق فالمباراة بين الفريقين.
وتحدث أنس الزنيتي الكابيتان ديال الرجاء الرياضي بعد خسارة الفريق أمام النصر السعودي بثلاثة والإقصاء، وقال: "فالشوط الأول دخلنا حشمانين وما دخلناش فالماتش من الأول ولكن واخا هاكاك ما كوناش نستقبلو 3 الأهداف باش تكون عندنا فرصة نرجعو فالماتش".
ووضح أنس الزنيتي: "الفرق دارتو خبرة اللاعبين د النصر بحال كريستياتو رونالدو وساديو ماني اللي عندهم إمكانيات بجودة عالية، جاوهم 3 فرص استغلوها وماركاو أهداف".
وكمل كابيتان الرجاء: "فالشوط الثاني ما نزلناش يدينا بالعكس كون كان فريق آخر بلاصتنا يقول سالا الماتش، ولعبنا شوط ثاني ممتاز جدا جاونا فرص كنا نستغلوهم ونحاولو نرجعو فالماتش وهذا الشي ما وقعش، وضيعنا 2 ولا 3 محاولات للتسجيل وهادي هي كرة القدم".
وختم أنس الزنيتي، وقال: "مبروك للنصر فريق كبير وعريق ونتمناو له التوفيق فكأس العرب، وحنا غنرجعو نوجدو للبطولة الاحترافية المغربية اللي غتبدا عندنا فاخر شهر غشت".