الرجاء ربحو بركان فأول ماتش مع بودريقة

ربح الرجاء الرياضي فريق نهضة بركان اليوم الأربعاء بملعب مركب محمد الخامس، برسم الدورة 27 من البطولة الاحترافية لكرة القدم.
وسالا الماتش بين الرجاء الرياضي ونهضة بركان بنتيجة 2 لواحد، وكان فريق الرجاء هو السباق للتسجيل بهدف ديال يسري بوزوق ماركاه فالشوط الأول، وفالشوط الثاني جابو بركان التعادل من بيلانتي بعدما ضيعو قبل منها بيلانتي أول حبسو كول الرجاء أنس الزنيتي، وهدف بركان ماركاه شادراك، ولكن الرجاء رجعوا ماركاو الهدف الثاني بواسطة محمد زريدة وبقات النتيجة كما هي حتى سالا الماتش.
وبهذا الرباح خذاو الرجاء 3 النقاط زادوها للرصيد ديالهم فأول ماتش للخضرا مع الرئيس اللي رجع للنادي محمد بودريقة، وصبح عند الفريق 39 نقطة وخذا المركز الخامس من نهضة بركان، اللي رجع للمركز السادس برصيد 36 نقطة.