سيتم حجب هذه الصورة تلقائيا عندما يتم الإبلاغ عنها من طرف عدة أشخاص.
ناويين لغدر وباغيين يسحبو الاعتراف بمغربية الصحرا. قيادي بارز فالحزب الشعبي الصبليوني: غادي نرجعو علاقتنا مع المغرب قبل ديك الرسالة الشهيرة لسانشيث للملك
حتى فالمواجهات التلفزيونية ديما كان الحزب الشعبي الصبليوني المعارض كيتفادى يعطي موقف واضح من قضية الصحرا. كان كيهاجم الاشتراكي سانشيث رئيس الحكومة المنتهية ولايتو٬ باللي ما خبرش البرلمان والمعارضة بقرارو الاعتراف بمغربية الصحرا فالرسالة الشهيرة اللي رسلها هادي عامين وشي شهورا للملك محمد السادس. داز يونياس فايخو فمواجهة مع سانشيث بمناسبة الانتخابات التشريعية فهاد البلد يوم 23 يوليوز وما هدرش على موقف واضح. كانت مواجهة بين الناطقين باسم 7 احزاب سياسية فيها الحزب الشعبي والاشتراكي العمالي الاسباني ووقع نفس الشيء. اليوم. لكن اش تغير اليوم السبت 15 يوليوز؟ اليوم خرج واحد من بارونات الحزب الشعبي گونزاليس بونس بتصريح صادم. القيادي اللي من ڤلانسيا مكلف بالعدالة والسياسة الخارجية قال فحوار مع "لاڤانگوارديا" خرج اليوم ان حزبو ايلى ربح الانتخابات وشكل حكومة٬ باللي غادي يرجع موقف اسبانيا من الصحرا على اللي كان عليه قبل رسالة سانشيث للملك. واضاف "غاديين نرجعو لعلاقتنا مع المغرب كيف كانت قبل الرسالة الشهيرة اللي حتى واحد علاش تكتبات ولا شكون كتبها ولا عارف شكون كتبها ولا الهدف منا". واكد باللي حزبو فالحكومة =ايلى ربح الانتخابات= غادي تكون عندو سياسة مع المغرب متوافقة مع قرارات الاممالمتحدة وغادي نخبرو البرلمان وغادي نرجعو علاقاتنا مع الجزائر دابا بونس ماشي غير بوحدو الفاعل الاول فالحزب بخصوص العلاقات مع المغرب٬ كاين بارون قوي بزاف وعندو علاقات قوية مع المغرب وهو الرجل الثالث فالحزب الياس بندودو =المنسق العام للحزب=. هادا سبق زار الداخلة وعندو علاقات قوية بزاف مع الرباط. دابا يونييس فايخو كان قال فمواجهة تلفزيونية مع سانشيث ان اول زيارة ليه لخارج اسبانيا غادية تكون مع المغرب. مع تصريح بحال هادا صعيب يشوفو شي حد فالمغرب تغيير الموقف الاسباني من الصحرا ايلى وصل اليمين غادي يخلي ازمة كبيرة تنفاجر بيننا وبينهم.
