الجيش الملكي بطل للمغرب للمرة 13 وبعد 15 العام ديال الغياب والوداد وصيف بعد موسم شابع تشويق

توج فريق الجيش الملكي بلقب البطولة الإحترافية لكرة القدم للموسم الرياضي 2022- 2023، بعدما ربح اليوم الجمعة إتحاد طنجة بمدينة طنجة برسم الدورة 30 والاخيرة.
واستغل الوداد الرياضي تعادل الجيش الملكي مع المضيف ديالو إتحاد طنجة بنتيجة 3 لجوج، وكانوا ليفار هم الاولين اللي ماركاو من بيلانتي سجلو رضا سليم فالدقيقة فالدقيقة 8، قبل ما يجيب سفيان المودن التعادل للطنجاويين من ضربة جزاء بهدف فالدقيقة 14، وفالشوط الثاني رجعوا ليفار وزادو الثاني بهدف ماركاه أحمد حمودان فالدقيقة 48، ولكن ولد الرجاء محسن متولي الكابيتان الحالي ديال طنجة جاب التعادل لطنجاوة بهدف واعر فالدقيقة 75، بعدما شد الكرة وديربلا حريمات كابيتان ليفار وضرب الكرة نيشان للشبكة، ولكن الجيش الملكي قدرو يجيبو بيلانتي فآخر لحظة ماركاه رضا سليم وعطى الرباح للفريق العسكري.
وبالنسبة للماتش الاخر بين الوداد الرياضي والمضيف ديالو المغرب الفاسي، سالا لمصلحة الواك بنتيجة 2 لزيرو، وماركا البيوتا للفريق الأحمر كل من هشام بوسفيان فالدقيقة 13، ويحيى جبران من بيلانتي فالدقيقة 53، بهذه النتجية رفع الرصيد ديالو إلى 66 نقطة.
الجيش الملكي بالفوز ديالو على إتحاد طنجة بنتيجة 3 لجوج، قدر يربح لقب البطولة الإحترافية لكرة القدم بعدما احتل المركز الأول برصيد 67 نقطة، مقابل 66 نقطة للوداد الرياضي صاحب المركز الثاني، وهذا هو اللقب 13 للجيش الملكي ديال البطولة وكيجي بعد 15 عام من الغياب.