ليفار ضربو أسكو التوكولي بخماسية وتصدروا لكروب فكأس الكاف

ربح فريق الجيش الملكي الماتش ديالو ضد أسكو كارا من التوكو اليوم الأحد فتيران مولاي عبد الله بالرباط، فالجولة 2 من كأس الكونفدرالية الإفريقية لكرة القدم.
وسالا الماتش بنتيجة 5 مقابل واحد لمصلحة الجيش الملكي، وكان فريق أسكو كارا هو اللي ماركا الأول فالماتش بهدف سجلو هاريسو أورو في الدقيقة 17، ولكن قدروا ليفار يرجعو فالماتش وجابو التعادل بهدف ماركاه ربيع حريمات فالدقيقة 39.
وفالشوط الثاني دخل فريق الجيش الملكي وهو كيبحث على الهدف الثاني، وفالدقيقة 50 قدر أحمد حمدان يماركي له الهدف ديال التقدم، وبعدها عزز له حمزة اكمان النتجية بهدف ثالث فالدقيقة 63، ثم مصطفى السهد زاد الهدف الرابع فالدقيقة 67، وسالا زكرياء فاتي مسلسل البيوتا للعساكر فاللحظات الأخيرة بهدف خامس.
وبهذا الرباح تحصل الجيش الملكي على 3 نقاط رفع بها الرصيد ديالو إلى 4 نقاط وكيتصدو ليفار لكروب 3، متبوعين ببيرامدز وفيوتشر المصريين ،واللي عند كل فريق منهم 2 نقاط، ثم كيجي فريق أسكو كارا من التوكو فالمركز الأخير بنقطة واحدة.