الوداد ربحت السوالم ورجعات لصدارة البطولة

ربح الوداد الرياضي المضيف ديالو شباب السوالم فالماتش اللي سالا ما بين الفريقين قبل لحظات فتيران البشير فالمحمدية، فالدورة 14 من الدوري الاحترافي المغربي ورجعت الحمرا للصدارة.
وسالا الشوط الأول ما بين الواك والسوالم تعادل زيرو لزيرو، وفالشوط الثاني قدر فريق الوداد الرياضي يماركي هدف الرباح بواسطة ايمن الحسوني اللي تبع كرة رجعت من الكول ديال السوالم وضربها نيشان للشبكة، وبقات النتجية كيفما هي واخا محاولات السوالم يرجعو فالماتش أو الوداديين اللي بغاو يزيدو هدف آخر، مع الإشارة بلي السوالم خرج لهم محسن عميمي بالحمرا فالدقيقة 90.
وبهاد الرباح رجع الوداد الرياضي لصدارة الدوري الاحترافي مناصفة مع الجيش الملكي وصبحت عندو 28 نقطة، أما شباب السوالم بقاو فالمركز السابع وعندهم 20 نقطة.