الوداد خرجو رابحين الماص فالشوط الأول وحاطو رجل فمنصة التتويج بالبطولة حيث ليفار معادلين مع طنجة

خرج الوداد الرياضي من الشوط الأول مع المغرب الفاسي برسم الدورة الأخيرة من البطولة الإحترافية اليوم الجمعة بفاس، وهو حاط رجلو الأولى على منصة التتويج.
وسالا الشوط الأول من ماتش الوداد الرياضي والمغرب الفاسي، بنتجية واحد لزيرو وهو الهدف اللي ماركاه هشام بوسفيان فالدقيقة 13.
وإلى حدود نهاية الشوط الأول، فالوداد مستغل تعادل الجيش الملكي مع إتحاد طنجة بمدينة طنجة بنتيجة واحد لواحد، وكانوا ليفار هم الاولين اللي ماركاو من بيلانتي سجلو رضا سليم فالدقيقة فالدقيقة 8، قبل ما يجيب سفيان المودن التعادل للطنجاويين من ضربة جزاء بهدف فالدقيقة 14.
استمرار الماتشات بجوج بهذه النتائج كيعطي للوداد الرياضي لقب البطولة الإحترافية لهذا الموسم، حيث رصيد الواك دابا هو 66 نقطة باحتساب نتيجة الماتش ضد الماص، أما رصيد الجيش الملكي هو 65 نقطة باحتساب نتيجة الماتش ضد اتحاد طنجة، وليفار عندهم حل واحد دابا هو يربحو طنجة فالشوط الثاني.