الوداد ربحو آسفي وحافظو على فارق النقاط مع ليفار

ربح الوداد الرياضي الماتش ديالو مع أولمبيك آسفي اليوم السبت بستاد دونور، برسم الدورة 28 من البطولة الإحترافية لكرة القدم.
وسالا الماتش بين الوداد الرياضي وأولمبيك آسفي بنتجية 3 لواحد، وكانوا أولمبيك آسفي هم الاولين اللي ماركاو بهدف على غفلة من فراب ديال محمد المرابط فالدقيقة 4، ولكن الوداد جابو التعادل بهدف ماركاه لاعب أولمبيك آسفي مونصف عامري على راسو فالدقيقة 14، وماركا جلال الداودي الهدف الثاني للواك برأسية فالدقيقة 19، وكان الوداد يقدر يزيد أهداف أخرى ولكن اللاعبين ديالو ضيعو الفرص بسبب قلة التركيز والتسرع،
ونفس الشي فالشوط الثاني فالوداد ما استغلوش الخرج ديال أولمبيك آسفي اللي بداو كيقلبو على التعادل، والفريقين بجوج بداو كيضيعو فالفرص والأهداف وبقات النتيجة كما هي حتى الدقيقة 89 فين ضرب يحيى جبران الهدف الثالث للوداد من ضربة جزاء، وقبل يضيع أولمبيك آسفي فرصة تقليص الفارق من ضربة جزاء تصدى لها لكول الودادي يوسف المطيع.
وحافظ الوداد الرياضي ملي ربح أولمبيك آسفي اليوم، على نفس الفارق مع المتصدر الجيش الملكي واللي هو 3 بوان، وصبح عند الفريق الأحمر 60 نقطة مقابل 63 نقطة عند ليفار، أما أولمبيك آسفي بقاو رابعين برصيد 41 نقطة.