البدراوي غادي بالرجاء للحيط.. الخضرا لعبات مع الفتح بلا روح وخسرت بثلاثية

كيستمر الرجاء في المعاناة تحت رئاسة عزيز البدراوي وقدم الفريق ماتش كارثي أمام الفتح الرياضي وخسر معه بتيران مولاي الحسن بالرباط، برسم الدورة 22 من البطولة الإحترافية لكرة القدم.
Ad
00:00
/
00:36
اللاعبين ديال الرجاء وبسب الأزمة اللي كيعاني منها الفريق مع عزيز البدراوي دخلوا لماتش الفتح الرياضي، وهم بلا روح وبلا تركيز وهذا الشي تأكد من خلال المستوى ديالهم والخسارة الكبيرة ضد المدرب جمال السلامي واللاعبين ديالو بنتجية 3 لزيرو.
وكان الشوط الأول من ماتش الرجاء والفتح كافي للفريق الرباطي باش يحسم المباراة، وماركاو فيه الفتحيين 3 ديال الأهداف أمام استغراب الجماهير الرجاوية من مستوى فريقها واللاعبين الرجاويين.
وسجل أهداف الفتح الرياضي كل من مروان عز اللي دار كونترول للكرة وضربها بطريقة زوينة للمرمى في الدقيقة 24 قدام اللاعبين ديال الرجاء وهم كيتفرجو فيه، والهدف الثاني جا من كوفرة واعرة ضربها المهدي قرناص ودخلت لمرمى الرجاء في الدقيقة 28 وحتى هي بقاو اللاعبين د الرجاء والحارس أنس الزنيتي كيتفرجو فيها حتى دخلات، والهدف الثالث رجع ماركاه مروان عز في الدقيقة 39 من بعدما تلاعب بدفاع الخضرا.
الرجاء الرياضي الجريح بكثرة المشاكل والعدوات اللي تخلقت في عهد الرئيس الحالي عزيز البدراوي، تراجع من بعد هذه الخسارة إلى المركز الخامس وبقات عندو 34 نقاط، أمام الفتح الرياضي حافظ على المركز الثالث ورفع الرصيد ديالو إلى 41 نقطة.