الركراكي خسر أول ماتش رسمي فلافريك.. جنوب إفريقيا ربحت الاسود فماتش صعيب

خسر المنتخب الوطني المغربي الماتش ديالو مع منتخب جنوب إفريقيا اليوم السبت بجوهانسبرك، برسم إقصائيات كأس إفريقيا لكرة القدم "الكوت ديفوار 2023".
وسالا الماتش بين المنتخب الوطني المغربي ومنتخب جنوب إفريقيا بنتجية 2 لواحد فتيران سوكر سيتي، ونجح المنتخب الجنوب إفريقي أنه يسجل الهدف الأول بكري بعد خطأ ديال لكول منير المحمدي اللي طلق الكرة ودخلت للشبكة ديالو فالدقيقة 6، وفالشوط الثاني زادو الجنوب إفريقيين الهدف الثاني بواسطة زاخيلي ليباسا اللي استغل سوء تفاهم وارتباك فالدفاع ديال المنتخب المغربي والحارس المحمدي وماركا الهدف فالدقيقة 48، أما الهدف ديال المغرب ماركاه حكيم زياش اللي دار كونترول واعر ودريبلا مدافع جنوب إفريقيا وضرب الكرة بشكل واعر هز بها الشبكة ديال الجنوب إفريقيين فالدقيقة 60، وكان المنتخب المغربي قريب يجيب التعادل فاللحظات الأخيرة ولكن قلة للتركز والتسرع حرم الاسود من الهدف الثاني.
وبهذه النتيجة كيكون الناخب الوطني وليد الركراكي خسر أول ماتش له مع المنتخب المغربي فالمنافسات الإفريقية مع العلم أن هذا أول ماتش له رسمي على الصعيد الإفريقي، وتراجع المنتخب المغربي إلى المركز الثاني فالمجموعة 11 وبقات عندو 6 النقاط، وطلعت جنوب إفريقيا إلى المركز الأول ولات عندها 7 النقاط، مع العلم أن المنتخبين بجوج ضامنين التأهل إلى كأس إفريقيا 2023 قبل هذا الماتش.