فاش ما جيتيه حاضر.. النجم المغربي أشرف حكيمي كاين فتشكيلة مالين لفلوس وفديال أحسن الكوايرية

أكد استطلاع للرأي أن الدولي المغربي أشرف حكيمي نجم باريس سان جيرمان، كيستحق القيمة التسويقية على المستوى اللي كيقدمو كلاعب كرة قدم.
ودارت جريدة "MARCA" الإسبانية، استطلاع للرأي لمتتبعي كرة القدم العالمية، وقارنت بين 2 تشكيلات، الأولى خاصة باللاعبين اللي كيشدو أعلى صالير فالبوسطات ديالهم والثانية فيها أحسن 11 لاعب كاينين حاليا فالعالم، وجا النجم المغربي أشرف حكيمي مع تشكيلات بجوج، كأحسن ظهير أيمن واللي كيشد 13 مليون أورو من باريس سان جيرمان كل عام.
وكاينين حسب نفس المصدر، 4 ديال اللاعبين فقط اللي قدرو يديرو بلاصتهم فتشكيلة مالين لفلوس وتشكيلة الكوايرية المزيانين دابا، هم أشرف حكيمي والأرجنتيني ليونيل ميسي، والبلجيكي دي بروين، والفرنسي كيليان مبابي.