حولي بكرونو..!!

نظم : صلاح اهضير
بمناسبة عيد الأضحى المبارك، نهدي للقراء الكرام هذه الزجلية حول كبش العيد:
يا محجوبة وَعيب الله هاذا خطير
بغيتي حولي بكرونو..وكيف ندير؟
زدتي قلت : صردي وسمين يكون مليح
وتكون عيونو عسلية ويكون كبير
والشواية على جنبك فايحة بعطور
قلب وطحال وضوارة..خبز وكومير
* مما غولة دارت خبلة من سوق لسوق
وانا مسكين حال الله ومول الخير
هاذا شاري ..هذا بايع ..هذا معدوم
وكل واحد يشكي همو لمول التيسير
يا محجوبة هاعار الله رفقي بيا.. !
ربي اللي عالم بحوالي وانا فقير
نْعِيجَة تكفي،أنا وانت، يهديك الله
ومعاها براد اتاي وخبز الشعير
أمحجوبة ديري عقلك..الزمان صعيب..!
شلا ما خاص ف هاذ الدنيا من تدبير
مزاوك فيك أمحجوبة ديري تاويل
وارمي اوهامك المنحوسة فقاع البير
***************
* مما غولة = إشارة الى الغلاء الفاحش