الوداد كيحتج على التحكيم فماتش الحمرا وبركان

قرر نادي الوداد الرياضي يحتج على المستوى التحكيمي ديال طاقم التحكيم اللي قاد ماتش الفريق البارح الثلاثاء، ضد نهضة بركان البارح، فالتيران البلدي لبركان برسم الدورة 19 من البطولة الاحترافية لكرة القدم.
وحسب مصدر مطلع فإدارة نادي الوداد، غادي توجه رسالة احتجاج للمديرية المركزية للتحكيم بالجامعة الملكية المغربية لكرة القدم احتجاجا على الأداء التحكيمي فماتش الفريق ضد نهضة بركان، وكتعتبر إدارة الوداد أن الفريق تعرض للظلم من التحكيم فهاد الماتش.
وخلف ماتش الوداد الرياضي والمضيف ديالو نهضة بركان، بوليميك كبير ملي سالا حيث بزاف من مكونات الوداد سوا جماهير أو "الوينرز" والمسؤولين داخل المكتب المديري عبروا على احتجاجهم وغضبهم من مستوى الحكام، فالماتش اللي سالا بنتيجة 3 أهداف لكل فريق وعرف جدل كبير على بزاف من الحالات التحكيمية.