كيفما قال "كود".. المهاجم الودادي لامكيل زي ما عندوش مشكل مع الحمرا والدليل حضورو فماتش السوالم

بالحضور ديالو اليوم مع الوداد الرياضي فماتش السوالم تأكد أن اللاعب الجديد ديال الحمرا لامكيل زي، تحل المشكل الإداري اللي كان عندو، وأنه واجد باش يلعب مع الفريق، وداكشي اللي راج عليه أنه عندو مشاكل مع النادي غير إشاعة.
وكان مصدر جيد الاطلاع كشف ل"كود" قبل يومين أن الكلام اللي كان كيروج بأن المهاجم الجديد ديال الفريق عندو مشكل مع إدارة النادي ما صحيحش وأنه بالعكس، المسؤولين ديال الحمرا مهاليين فيه، والمشكلة اللي عندو هي إدارية داكشي علاش ما لعبش فماتش آسفي اللي فات، حيث كانت البطاقة الدولية ديالو ما وصلاتش من بلجيكا للمغرب.
والتواجد ديال لامكيل زي، فماتش الحمرا ضد السوالم، كيأكد أن اللاعب ما عندوش مشكل مع الوداد اللي سنا معاه إعارة حتى نهاية هاد الموسم مع إمكانية شراء العقد بشكل نهائي، وأن داكشي اللي كان كيروج بلي اللاعب رفض يلعب ضد آسفي غير إشاعات حيث بمجرد ما وصلت بطاقتو الدولية دخل شارك مع الزملاء ديالو الوداديين.