على طريقة الركراكي.. المهدي النفتي حتى هو غيخدمو معه فالوداد 2 معدين بدنيين إسبان

من المنتظر باش تكون طريقة عمل التونسي المهدي النفتي المدرب الجديد للوداد الرياضي مشابهة بشكل كبير للمدرب السابق للفريق وليد الركراكي، فانتظار يمشي حتى هو على الخطوات ديالو وتكون التجربة مع الحمرا ناجحة.
وكشفت مصادر مطلعة ل"كود" أن المهدي النفتي، حتى هو متشبع بطريقة التدريب الإسبانية فحالو فحال صاحبو وليد الركراكي، وخصوصا فالجانب البدني، حيث كأيمن حتى هو بالمدرسة الإسبانية فتطوير اللياقة البدنية ديال اللاعبين مثل الركراكي اللي خدامين معه 2 معدين بدنيين إسبان فليكيب ناسيونال، وخصوصا أن النفتي اكتسب تجربة مهمة ملي كان خدام فإسبانيا مع "ليفانتي" و "ليكانيس".
نفس المصادر قالت ل"كود"، إن المهدي النفتي غادي يخدم معه 2 معدين بدنيين بالطاقم التقني ديال الوداد الرياضي وغاد يوصلو اليوم الثلاثاء إلى المغرب باش يسنيو العقود ديالهم ويشوفو اللاعبين من أجل التعرف على الحالة البدنية ديالهم ويبداو خدمتهم، حيث هما والنفتي عارفين المسؤولية اللي عليهم، وأن الوداد تبعينها ماتشات مهمين وفمقدمتهم ديال كأس العالم للأندية هادشي علاش لافريشور فيزيك مهمة بزاف.