مدرب الوداد الجديد صاحب الركراكي. قبل ما يوقع مع الحمرا هدر معاه وشجعو مدرب الاسود وفسر ليه امور كثيرة منها الجمهور الرائع =تصاور حصرية لوليد والمهدي فصبانيا وفرانسا=

مدرب الوداد الجديد مهدي النفطي صديق مقرب للمدرب وليد الركراكي اللي كان فالحمرا قبل ما يمشي للمنتخب. وفق مصادر "كود" كان اتصال بين الصديقين بعد تلقيه عرض لتدريب النادي الكازاوي. وفق مصادر "كود" "الركراكي شجعو باش يجي للواك وهدر عليه على جمهورها العظيم وعلى "العائلة الودادية".
وليد ومهدي كيتعارفو باش كانو ففرانسا. وفق مصادر "كود" النفتي اللي حتى هو كيلعب مدافع مع المنتخب التونسي ومع الاندية اللي لعب فيها٬ باش كان فتولوز من 1997 حتى 2000 تلاقى مع الركراكي فنفس النادي اللي كيلعب فالدوري الفرنسي.
مدرب الوداد الحالي النفطي مشى لراسينگ سانتاندير ف"لاليگا". هنا غادي يتبدل مسارو المهني وغادي يبدا رحلة حب لهاد لبلاد واخا لعب فالنگليز شي مواسم قليلة.
وفق مصادر "كود" فالنفطي باش شاف النادي الاسباني سانتاندير كيقلب علي مدافع اقتارح عليهم يجيبو وليد الركراكي. هنا غادي يسيني معاهم وغادي يلعبو بجوج عامين.
الركراكي كان لعب مع تولوز من 1999 حتى 2001 ودوز تجربة مع اجاكسيو حتى 2004 عاد مشى عامين لراسينگ سانتاندير.
المدرب الجديد للوداد واسمو بالكامل مهدي بن صدوق النفطي من مواليد 1978 ولعب مع منتخب بلادو 44 ماتش. كان فالماتش اللي ربحو فيه التوانسة الاسود فكأس افريقيا للامم 2004 واللي تنظمات عندهم. لعب حتى كأس العالم 2006 بالمانيا
النفطي دابا ممكن تكون عندو الجنسية المغربية لان امو مغربية.