مدرب الوداد الجديد باغي جمهور الوداد يدير معاه النية باش يمشيو بعيد وعندو كارط بلانش من الناصيري

مدرب الوداد الجديد التونسي المهدي النفطي فرحان بالمهمة الجديدة. اول تجربة ليه فافريقيا بعد تجارب كثيرة فاسبانيا مع عدة اندية ف"لاليگا".
النفطي اللي كان قال البارح بعد توقيعو العقد مع رئيس الحمرا سعيد الناصيري باللي كيفتاخر باللي جا للعائلة الودادية" اكد باللي غادي يدير مجهود باش الحمرا تحقق اهدافها.
المدرب٬ وفق مصادر "كود"٬ باغي جمهور الحمرا يدير معاه النية باش يمشيو بعيد فالمنافسات اللي داخلاها الوداد هاد الموسم.
طبعا غادي يبدا اليوم اول لقاء ليه مع اللعابة. "هاد المدرب عندو ذكاء وكيعرف كيفاش يتعامل مع اللعابة. عندو قدرة يخليهم يعطيو اللي عندهم. هادا مهم بزاف لنادي كبير بحال الوداد" يشرح احد المقربين منو ل"كود".
زيد علي هاد الشي٬ فرئيس الوداد البيضاوي عطاه كارط بلانش باش يخدم. وجد ليه اللي محتاجو وغادي يبعد منو باش ما يعيشش تحت الضغط "هادي ميطود الناصيري. كيخلي المدرب مرتاح. كيوفر ليه كاع الامكانيات. كيخليه يفكر غير فالوداد. طبعا فالمقابل خاصو يبين النتائج فاقرب وقت" يشرح مصدر ودادي ل"كود".
الوداد لاعبة غدا مع المحمدية فماتش عن البطولة. ما يمكنش نحكمو على المدرب ولكن لمستو فتعاملو مع اللعابة تقدر تبان على المستوى النفسي