الركراكي: فرحان باللعابا اللي تقاتلو على تحقيق المركز 4 فالمونديال والكرة جمعات المغاربة كاملين وفرحتهم

عبر الناخب الوطني وليد الركراكي على الفرحة ديالو بالمنتخب الوطني المغربي اللي حقق المركز الرابع فكأس العالم 2022، لإنجاز غير مسبوق فتاريخ كرة القدم المغربية والإفريقية والعربية، وتأسف حيث ما قدروش يتوجو ولو بالميدالية البرونزية من بعد الخسارة أمام كرواتيا فماتش الترتيب بنتيجة 2 لواحد.
وقال وليد الركراكي فتصريح له من بعد نهاية ماتش المغرب وكرواتيا: "انا فرحان حيث اللعابا عطاو اللي فجهدهم وراه كلشي شاف كيفاش سالينا كأس العالم ببدر بانون وسفيان امرابط فلاكس سونترال، كانوا عندنا بزاف الإصابات وحتى العيا".
وكمل الركراكي: "لعبنا اليوم الماتش السابع فكوب ديموند، حتى حكيم زياش واشرف حكيمي كان عندهم لعيا طحنا اليوم كرواتيا فرقة مزيانة تقنيا كانوا مزيانين شدو الكرة، تعلمنا من هاد البطولة ودابا خاصنا نكونو فرحانين حيث حنا مع 4 الأولين فالعالم، وخاصنا نزيدو نخدمو".
وختم وليد الركراكي: "الكرة جمعتنا فحال العائلة والبلاد كاملة فرحت معنا عطينا اللي فجهدنا واللعابا تقاتلو وماتو على توني المغرب وهادشي هو المهم ماكتابش لنا نتوجو وخاصنا نتعلمو من هاد البطولة".