الركراكي قبل ساعات من ماتش كرواتيا: غادي نربحو باش نطلعو لبوديوم ونرجعو بالبرونزية للمغرب

أكد الناخب الوطني وليد الركراكي أن المنتخب الوطني المغربي غادي يدير المجهود ديالو باش يسالي كأس العالم قطر 2022 ، بانتصار فماتش تحديد المركز الثالث والرابع أمام منتخب كرواتيا اليوم السبت، والفوز بالميدالية البرونزية وإهدائها للمغاربة.
وليد الركراكي فحوار نشرو الإتحاد الدولي لكرة القدم "الفيفا" على الموقع ديالو هاد الصباح وقبل ساعات فقط من ماتش المغرب وكرواتيا، شدد على ضرورة الفوز فالماتش السابع والأخير للمنتخب الوطني فكوب ديموند.
وقال وليد الركراكي: "حنا ملتازمين قدام جمهورنا بتحقيق الانتصار ونهديوه لهم، راه احتلال المركز الثالث كيعني أن غادي تطلع البوديوم، داكشي علاش راه مهم للبلاد واللعابا انهم يساليو كأس العالم بشكل مزيان، وغادي نديرو جهدنا كامل باش نرجعو بالمركز الثالث إلى المغرب".
وغادي تنطلق مبارة الترتيب ما بين المغرب وكرواتيا مع 4 لعشية فتيران خليفة الدولي بالعاصمة القطرية الدوحة، وغيكون فيها المنتخب الوطني المغربي على موعد مع كتابة التاريخ حيث الفوز كيعني احتلال المركز الثالث فكأس العالم لأول مرة فتاريخ كرة القدم المغربية والإفريقية والعربية، ولأول مرة بالنسبة لمنتخب من خارج القارتين الأوروبية والأمريكية الجنوبية.