الركراكي: مقلقين حيث ما غاديش نلعبو الفينال ولكن اللعابا باغيين يجيبو الميدالية النحاسية.. المركز الثالث ماشي هو الرابع

اكد الناخب الوطني وليد الركراكي أن اللعابا ديال المنتخب الوطني المغربي مازل مقلقين بسبب الخسارة مع المنتخب الفرنسي والإقصاء من نصف نهائي كأس العالم قطر 2022، ولكن فنفس الوقت عندهم رغبة قوية باش يتوجو بالميدالية النحاسية بالبطولة.
وليد الركراكي تحدث فالندوة الصحافية اللي كتسبق ماتش تحديد صاحبي المركزين الثالث والرابع ما بين المغرب وكرواتيا وقال: "مقلقين حيث ما غاديش نلعبو الفينال، ولكن كنفتاخرو حيث وصلنا لنصف النهائي".
وبخصوص ماتش الترتيب قال وليد الركراكي: "مازال اللعب، والدراري مازال الشهية ديالهم مفتوحة وباغين يجيبو الميدالية، عارفين الماتش ضد كرواتيا ما غاديش يكون ساهل ولكن حنا ثايقن فريوسنا".
اعتبر الركراكي أن الحصول على المركز الثالث فكأس العالم قطر 2022، مهم بزاف وماشي فحالو فحال الرابع، وأحسن حاجة هي المنتخب يرجع بالميدالية النحاسية وكشف بلي كان خاصو يرجع المورال للعابا اللي مقلقين حيث الهزيمة فالدومي فينال ديال المونديال ماشي ساهلة.
واضاف: "كان خاصنا نخدمو بزاف على الجانب الذهني والنفسي ديال اللعابا من بعد الاقصاء من نصف النهائي حيث الهزيمة فالدومي فينال ماشي سهلة".
وأكد وليد الركراكي أيضا: "أحسن حاجة هي نربحو الميدالية النحاسية، وراه الماتش ديال غدا مهم بزاف حيث إنهاء كأس العالم فالمركز الثالث ماشي هي تسليه فالمركز الرابع وخاصنا نحسنو الترتيب ديالنا فالتصنيف العالمي".